ALL Story Talent Poem Videos Memories Quotations Book Review health tips News Serial
మల్లెపూలు: - జగదీశ్ యామిజాల
October 30, 2020 • T. VEDANTA SURY • Memories

1961 ప్రాంతంలో వరవరరావుగారు ఓ కవిత రాశారు. అది మల్లెలపై కవిత. అది రాయడానికి కారణం, టాగోర్ స్ట్రేబర్డ్స్, గీతాంజలిని చలం చేసిన అనువాద రచనలే. అవి తననెంతో ప్రభావితం చేశాయన్నది వరవరరావుగారి మాట.

ఆయన చలంగారికి "మల్లెల"పై ఓ ఉత్తరం రాస్తూ 'అరుణాచలంలో ఏ పూలు ఎక్కువగా పూస్తాయో తెలియదుగానీ ఆ ప్ర శాంత వాతావరణం మల్లికాసుమ పరిమళం కన్నా గొప్పదైన అనుభవాన్ని మనసుకిస్తుందని విశ్వసిస్తాను. అందుకే ఆంధ్రదేశం పోగొట్టుకున్న మిమ్మల్ని అ రుణాచలం కడుపులో దాచుకున్నది. భగవాన్ రమణ మహర్షి అనే అలౌకిక కుందనసుమం మీ మనస్సునలా ఆకట్టి ఉండాలి. ఆ ఆధ్యాత్మిక లోకాల గురించి నాకు తెలియదు. నేను రాయలేను కూడా. టాగోర్ స్ట్రేబర్డ్స్, మీ గీతాంజలి అనువాదం చదివాక అలాగే ఓ 70 ఖండికలు వ్రాసాను. ... అంటూ మల్లెపూలపై కొన్ని కవితలను చలంగారి అభిప్రాయానికి పంపారు వరవరరావుగారు. 

వాటిలో ఒకటి రెండు కవితలిక్కడ చూడగలరు.....

చలికాలం వేకువ నీవు మల్లెపూవువై 
పూస్తే
నేను మంచునయి కురుస్తాను

నీ విచ్చిన అలౌకిక స్పర్శకు
నీ రెక్కలమీదే కరగిపోయి
నీ గుండెల్లో సురలిపోతాను
పొద్దుపోయాక నిన్నేరుకున్న ఏరికీ
నీ ఆత్మలో నేనున్నానని తెలియదు
నీ గుండెలను తడిపింది నేనేనని
నీవైనా మరచిపోయేవు

మల్లెపూవులాంటి మనసుమీద
వయస్సు మంచుపొర కప్పింది
నీ లేఎండ కిరణాలు సోకి
యీ పొరలన్నీ విచ్చుకోనిదే
ఈ అనంత సృష్టినెలా 
అర్థం చేసుకోగలను?
ఈ భూమిమీద 
ఈ మల్లెలు ఎవరికోసమని రాలినవి?
తన వ్రేళ్ళను కడుపులో దాచుకొని 
వానికి నీళ్ళు త్రాగించి
తాను ఆకాశమంత ఎత్తు పెరిగి
అవనికంతా తావులు వెదజల్లేట్లు చేస్తున్న
పుడమితల్లికి కృతజ్ఞతగా 
తరువు రాల్చిన ఆనందాశ్రులవి....."

వరవరరావుగారు తమ ఉత్తరం చివర్లో 
"మీ దగ్గర ఏ పూలు పూస్తున్నవి?
లేత ఎండను సూర్యకాంతిని మీరు వర్ణించినంత అందంగా బహుళంగా ఆంధ్రసాహిత్యంలో మరెవ్వరూ వర్ణించలేదు. మెత్తని ఎండ - తెలుగులో మీరు వాడకానికి తెచ్చిన మృదువైన పలుకుబడి. మీ ఉత్తరం పూవులాగుండాలి....."

ఆయన మల్లెల ఖండికలకు చలంగారి ప్రతిస్పందన నాకు లభించలేదు. చలంగారు తప్పకుండా ఏదో ఒకటి రాసే ఉంటారు. చలంగారికి మల్లెపూలంటే ఎంతో ఇష్టం.
ఆయన మ్యూజింగ్స్‌లో ''మల్లెపూలు' పై రాసిన మాటలు దీన్ని స్పష్టపరుస్తాయి.