ధనమును ప్రేమించుమన్నా!:--గుర్రాల లక్ష్మారెడ్డి, కల్వకుర్తి.-నాగర్ కర్నూల్ జిల్లా.-సెల్ నెం.9491387977.

ధనమునే ప్రేమించుమన్నా

దానమన్నది తుంచుమన్నా

వొట్టి మాటలు కట్టిపెట్టోయ్

గట్టి బ్యాంకులో దాచిపెట్టోయ్ !

అప్పుల్లోళ్ళ వెంట తిరిగి తిరిగి

వడ్డీ కోసం నీవు పాటు పడవోయ్

నడ్డి విరిగి జబ్బు చేసిన అసలు

డబ్బుకు నీవు విసిగి పోకోయ్ !

డబ్బు ఎక్కువ నాకు ఉందని

వొట్టి గొప్పలు చెప్పుకోకోయ్

పూనిఒక గొప్ప బ్యాంకును నీవే

కట్టి అప్పులోళ్లకు చూపవోయ్!

సొంత లాభం కొంత పెంచి

పొరుగువారి దుంప తెంచోయ్

ధనం అంటే ఇంధనం కాదోయ్

అది అసలు వడ్డీ బంధమోయ్ !

వడ్డికై నీవు అణిగి మణిగి

అప్పులోళ్ళను దువ్వవలెనోయ్

నీదు మంచిని వారు యెంచి

మరల వడ్డికి వత్తురోయ్ !