తులసి- సమ్మోహనాలు ( ముక్త పదగ్రస్తము):---ఎం. వి. ఉమాదేవి నెల్లూరు

కోటలో తులసమ్మ 

తులలేని సిరులమ్మ 

సిరులిచ్చి దీవించు కొలువగా ఓ ఉమా !

పెరటిలో కళకళగ

కళల సౌభాగ్యముగ

సౌభాగ్యవతులుగా ఆశీస్సు ఓ ఉమా !

పావనికి నీటినే 

నీటితోడ హృదినే 

హృదయ పూర్వకముగా అర్పించు ఓ ఉమా !

పసుపు కుంకుమ కోట

కోటలో కొలువులట

కొలువుదీరునమ్మా తులసమ్మ ఓ ఉమా !

పూల తో కొలిచేము 

కొలిచీ నైవేద్యము 

నైవేద్యమును పంచి మురిసేము ఓ ఉమా!

క్షీరాబ్ది ద్వాదశికి 

ద్వాదశిన ఆ హరికి 

హరితోడ పూజలే జరిపించు ఓ ఉమా!

తులసి కళ్యాణమది 

కళ్యాణ కరముయది 

కరములే జోడించి ప్రదక్షిణ ఓ ఉమా!

జలంధర వీరతకు 

వీరత్వ పదిలముకు 

పదిలపరచే  తులసి పావనియె ఓ ఉమా !

కోటలో మహరాణి 

మహాత్మగ యలివేణి 

అలివేణులందరికి అమ్మయే ఓ ఉమా !

ఎర్రమట్టిని అలికి 

అలికి రంగు ముగ్గుకి 

ముగ్గుతో అలంకరణ చేసిరి ఓ ఉమా!

ఔషధపు మొక్కలుగ

మొక్కగాలి సోకగ

సోకినను వ్యాధులే వీడునే ఓ ఉమా !