వావిలాల ఉన్నతపాఠశాలలో కాళోజీ జయంతి వేడుకలు

 ప్రజాకవి కాళోజీ నారాయణరావు జయంతి సందర్భంగా గురువారం  జిల్లాపరిషత్ ఉన్నత పాఠశాలవావిలాలలో "తెలంగాణా భాషాదినోత్సవం" ఘనంగా జరుపుకున్నారు. పాఠశాల ఇంఛార్జి ప్రధానోపాధ్యాయులు శ్రీ కొండూరు నాగయ్య గారు కాళోజీ చిత్రపటానికి మాలాంకరణచేశారు.ప్రముఖ కవి,గణితోపాధ్యాయుడు శ్రీ అడిగొప్పుల సదయ్య తను కాళోజీ గురించి రాసిన కవితను చదివివినిపించారు.

కాళోజీ-తెలంగాణా ఖలేజా

బక్క పలచని ఉక్కు పిండం

నిక్క పొడచెడి శంఖు కంఠం

రుధిర జ్వాలల రుద్ర నేత్రం

పిడికిలికి నిలువెత్తు సాక్ష్యం...

బడుగు జీవుల అడుగు మడుగుల

కొత్త జాడలు విత్తుటకు నొక

కలము హలముగ కైత పంటను

కూర్చి నూర్చిన కృషీవలుండు...

బాస యందలి యాసపైపడి

దాడి చేసెడి చెనటిగాళ్ళకు

పాడె కట్టియు కాటి కంపిన

తెలంగాణా నుడికి కాపరి...

నిజాం రాజుకు నివురు గప్పిన

నిప్పు కణికై నిల్చి వెలిగిన

తెలంగాణా తెగువదనముకు

చురుకు మెరుగులు దిద్దినోడు...

 *కా* లమును, *లో* కమును కలిపియు

 *జీ* తమును వడబోసి యిచ్చిన

తెలంగాణా కల్పవల్లికి

ధీర మానస పుత్ర రత్నం...

ఈ కార్యక్రమంలో ఉపాధ్యాయులు  చంద్రకిరణ్ ,చంద్రశేఖర్,వెంకట్రాజయ్య, హరీష్,అడిగొప్పుల సదయ్య, చంద్రకళ,ఉషారాణి, పద్మావతీదేవి,హరికృష్ణ,లాలూ ,విద్యార్థులు పాల్గొన్నారు.