ధీరుల త్యాగ ఫలం;- నాశబోయిన నరసింహ (నాన),చిట్యాల,నల్గొండ జిల్లా 8555010108

ఎన్నో బెదిరింపు చర్యల ఎదిరింపు పరంపర 

ఎన్నెన్నో తిరగబడి బిగించిన ఉక్కు పిడికిళ్ళు 

మరెన్నో బలిదానాల నెత్తుటి మరకల పేజీలు 

ఇంకెన్నో ఉవ్వెత్తున ఎగిసిపడే అగ్నికెరటాలు !

ఆంగ్ల వలస పాలన విముక్తికై తూటాలకు ఎదురొడ్డి 

బానిస బంధన చేధనకై ఉరికంబానికి ఊయలలూగి 

ఓ అహింసా వాదం మరో సాయుధ పోరు మార్గం

కుల మత భాషా బేషజాలకు నిప్పంటించిన వైనం !

లాల్ బాల్ పాల్ గాంధీ అంబేడ్కర్ సరోజినీ 

భగత్ ఆజాద్ అల్లూరి నేతాజీ వీరనారి ఝాన్సీ

వేల వేల ఉద్యమ దివిటీల ఉత్ప్రేరక కారకం

అంచెలంచెల క్విట్ ఇండియా ఉద్యమ శిఖరం !                                                                                                  

కవి గాయక నాయక చైతన్య ప్రవాహం                                     

ఆసేతు హిమాచల ఆబాలగోపాల మేకమై                        

ఎదఎదలో దేశభక్తి  సమైక్య గీతాలాపనం                                                                                   

నిద్రాణమైన జాతి యావత్తు జాగృతమైన వైనం !

అమెరికా పౌరహక్కుల పోరాటానికి ప్రేరణగా 

దక్షిణాఫ్రి

కా వర్ణ వివక్ష పోరుకు మార్గదర్శిగా

ఒకటా రెండా శత వసంతాల పోరాట చరిత్ర

భరతమాత చరణాల చెంత నెత్తుటి దీపారాధన !

 

దేశమిచ్చిన దేహం కణకణం దేశానికే అర్పితం

తల్లీ! నీ కోసం మరణం మా జన్మ ధన్యమంటూ..

ధీరుల త్యాగ ఫలం రేపటి తరం ఆశల వారధి కోసం

స్వేచ్ఛాసుమా లెదజల్లిన అమర వీరులకు వందనం !

🇳🇪🇳🇪🇳🇪🇳🇪🇳🇪🙏🇳🇪🇳🇪🇳🇪🇳🇪🇳🇪