నిషేధం స్వరం;-డా. సిద్దెంకి యాదగిరి 9441244773

స్వాతంత్ర వజ్రోత్సవ వేళ 

ఇంకను నిషేధించబడుచున్న మానవులుగా మాట్లాడుతున్నం

జోడించిన చేతుల్ని తెగ్గోయబడిన అమానుషాలను వినిపిస్తున్నం 

కారంచేడు నరమేధం నుంచి కాలుతున్న శవాలదాకా నిదానించి చూడండి

తెగిపడ్డ తలలు 

మొలిచిన సమాధులు

మోడైన బతుకులు 

 లెక్కకు మించి 

కులమదం 

అవమానాలకు గుచ్చి ఊరేగిస్తున్నాయి

ఘడియ ఘడియ కు బతుకు సుడిగుండం

పూట పూటకు నిత్య బలి జరుగుతుంది 

అంతరాల జాడ్యంలో అంతులేని బాధ

వెంటాడుతుంది

కంచికచర్ల కోటేశు వారసులు

అంగ విచ్ఛేదనమైన మంథని మధుకర్ లు

నరకబడ్డ ప్రణయ్ లు  

వివక్షల విష వలయంలో విగత జీవులవుతూనే ఉన్నారు

ఒక ఆకలి తెంపిన రెండు మామిడి పళ్ళు

అందరిముందు గ్రామ పంచాయతీలో ఉరితీస్తాయి

నీదెప్పుడూ కిందిమెట్టని నిందించే

అభ్యంతరాల విద్యాలయాలు 

ఇప్పటి రోహిత్ లను వేపుక తింటున్నాయి

వజ్రోత్సవ సాక్షి గా 

పాఠాలు నేర్పాల్సిన పీఠాల్లో 

నీళ్ళ కుండను ముట్టిన తొమ్మిదేళ్ల బాలున్ని 

యథేచ్ఛగా అంటరానితనం చావబాది జీవి తీసింది 

మువ్వన్నెల జెండా తీరు 

ఆకలితో జీవిస్తం కానీ

అవమానాలతో కాదు 

ఇల్లు లేకపోవచ్చు కానీ ఒళ్ళంతా దేశభక్తి

జండాను ఆత్మ గౌరవంతో ఎగురేస్తం

భారతదేశం శత్రు భూమి కాదనీ 

భారతీయులంతా నా సహోదరులేనని ప్రకటిస్తున్నం

మారే వరకు మార్చే వరకు

చివరికి మేం చనిపోతూ 

జై బోలో 

స్వాతంత్ర భారత్ కి అని నినదిస్తూనే ఉంటాం