"పులిహోర" ప్రసాదం ; -శంకరప్రియ., శీల.,--సంచారవాణి: 99127 67098

 👌అంబకు నివేదనము
"పులిహోర" ప్రసాదము!
     భక్తులకు ప్రమోదము! 
ఆత్మ బంధువులార!
       ( ఆత్మబంధు పదాలు., శంకరప్రియ.,)
👌"హరిద్రాన్నము" అంటే.. సహజ సిద్ధమైన, రోగనిరోధక శక్తినొసఁగు; పసుపు కలిగి యున్న, దివ్యాన్నమే.. "పులిహోర"! దీనినే టైగర్ రైస్ అని, పిలుస్తారు! ఆంధ్రులు గర్వించే వంటకమే "పులి హోర"! అది.. రెండు రకాలు! ఒకటి నిమ్మరసం పులిహోర! రెండవది.. చింతపండురసం పులిహోర!
👌నిమ్మరసం  పులిహోర... ఆ పలచని పసుపు కాంతి నీరెండలా మెరుస్తూ; "లేత యవ్వన కన్య" లా ఉంటుంది! అట్లే, చింతపండు రసం పులిహోర.. ఇంత పసుపు పట్టించి స్నానం చేసి, గుప్త గాంభీర్యాన్ని పోగేసుకున్న "పూర్ణ ముత్తయిదువు"లా ఉంటుంది.
👌పులిహోరలో... పోపుపెట్టె లోని దినుసులైన.. ఆవాలు, ఇంగువ, వేరుశెనగ గుళ్ళు, (పల్లీలు)  జీడిపప్పు, పచ్చిమిర్చి, ఎండుమిర్చి..మున్నగు వాటిని చేర్చి; నూనె లేదా నేతిలో వేయించు తారు! తరువాత, కరివేపాకును వేసి; మూకుడులో వేయించిన వాటిని, హరిద్రాన్నములో కలుపుతారు! అదియే.. "పులిహోర" ప్రసాదము!
👌పులి హోరను ..ఇష్ట దైవమైన అమ్మవారికి, స్వామివారికి.. నివేదన చేస్తాము! తరువాత, ప్రసాదంగా స్వీకరించి నప్పుడు; ఒక పంటికింద చింతపండు లో ఊరిన పచ్చిమిర్చి; మరో పంటికింద వేరుశెనగ గుళ్ళు నములుతుంటే; ఆ రుచి చెప్పనలవి కాదు! అదొక చక్కని అనుభూతి!
      ⚜️సీస పద్యము⚜️
     హరితవర్ణపు కాంతు లానంద మొనగూర్చు,
"పులిహోర" మనపాలి పూర్ణశక్తి
     దేవాలయమ్ముల దేదీప్య మానమై
వరప్రసాదమ్ముగా, కరవుదీర్చు
     పండుగల్ పబ్బాలు, నిండుగా వెలుగొందు
"పులిహోర" ఘుమఘుమల్ పుష్టి తుష్టి
    రవ్వతో పులిహోర రవ్వంత రుచినిచ్చు
నిమ్మకాయను చేర్చ నెమ్మదించు
          🚩ఆ.వె.
     చింతపులుపు కలియ, చిగురించు కోర్కెలే
      తిరగమాత కూడి సిరులమూట
       కవన మల్లగాను, కావలె "పులిహోర"
       అమ్మ చేతివంట, కమ్మదనము!
      ("తిరగమాత" అంటే.. పోపు వేయడం) 
     ( రచన: డా. గాయత్రీ దేవి., )
🚩ఓం శ్రీమాత! జయ  శ్రీమాత! జయ జయ శ్రీమాత!
            (శ్రీమాత షోడశాక్షరి(16)నామ మాలిక., )