వెండి తెరకు వెన్నెల సంతకం సినారె ;---బాలవర్ధిరాజు మల్లారం

అక్షర శిల్పి;పద్మశ్రీ  కళా ప్రపూర్ణ,, పద్మభూషణ్, డాక్టర్జ్ఞానపీఠ పురస్కృతులు  సి.నారాయణరెడ్డి గారి 92 వ జయంతి సందర్భంగా ఆ మహాకవికి నా అక్షరాంజలి...

----------------------------------------

ఏ కవి ప్రతిభా పాటవాలను వీక్షించి

తెలుగు కళామ తల్లి పులకించి పోయిందో

ఏ కవి కలాన్ని చూసి

అక్షరాలు ఆనంద తాండవం చేసాయో 

ఏ కవి రాస్తే 

పగలే వెన్నెల కు( వి)రిసిందో 

ఏ కవి కవితావనంలో 

లలిత పద సౌరభం గుబాళించిందో 

ఏ కవి గళం వింటే

వీనులకు విందయిందో 

ఏ కవి లేఖిని నుండి 

కొంగ్రొత్త సాహితీ ప్రక్రియలు పురుడు పోసుకున్నాయో

ఏ కవి ఇంటి పేరుకు 

కవిత చిరునామా అయ్యిందో

ఏ కవి గేయం 

వెండి తెరకు వెన్నెల సంతకం అయ్యిందో

ఏ కవిని వీక్షిస్తే 

తెలుగు సంస్కృతీ , సంప్రదాయాలు సాక్షాత్కరించాయో ..

ఏ కవి ధిషణకు 

పదవులు ఏరి కోరి వరించి మురిసిపోయాయో

ఏ కవి వల్ల 

తెలుగు కీర్తి పతాక విశ్వవ్యాప్తమయ్యిందో 

ఏ కవి విద్వత్తు నచ్చి

జ్ఞానపీఠమే మురిసిపోయిందో

ఏ కవి , కవిత్వాన్ని 

తన ఊపిరిగా శ్వాసించి , శాసించాడో

ఆ కవే ..

మహాకవి సినారె!

ఆ మహాకవి 

తెలుగు కవితై నిలిచాడు 

తెలుగు పాటై వెలిగాడు 

తెలుగు మాటై మిగిలాడు 

తె(వె )లుగు బాటై వెలిసాడు 

అక్షరానికి మరణం లేదు 

అక్షరమైన ఆ సుకవికీ 

మరణం లేదు ;

జననం తప్ప !

ఆ మహాకవి' సినారెకివే 

నా అక్షరాంజలి!