అనుకుంటాం గానీ
అన్నీ లొంగవు చేతివాటానికి
కొన్ని చేతికే చిక్కవు ఊసుపోక
మనమే గాలిగాలి
అది నాది ఇది నాదను తలపు
కళ చెదిరిపోని కల
ప్రయత్నం చెయ్ తప్పక
మానవధర్మం మంచిదేగా
ఐతే
ప్రతి సందర్భం సమయమూ ఒకేలా
ఉంటే
అది బతుకెందుకౌతుంది మిత్రమా
ఎన్నో కలలు కలతలూ సాలీడు
అల్లిన కళాకాంతి పాఠమైంది అడుగడగులో
అనితర సాధ్యమైన
గెలుపు అంచులు చుట్టే లయ నాడిగుండె అణువణువునా
అన్నివేళలా తపించే పని జీవపదార్థమే
చేసే ప్రతి పనిలో నీదైన ద్విగుణీకృత ముద్ర ఉంటేనే
అదో నిగూఢ నిర్మల గాఢ సముద్ర గీతం
పనిరాక్షసం నేర్పిన విద్య లక్షితమైన
విజయం
చేకూరే దాక విశ్రమించొద్దు
ఇక పనిలో ఆనందం అమితం అమేయం తొవ్వుకో తోడుకో
బతుకంతా నింపుకో స్వేచ్ఛగా
శ్రామిక కరచాలనం ఓ ధీమా
బతుకు పొరల్లో
పని తాత్వికత మట్టిలో అరుదైన మానవీయత
addComments
కామెంట్ను పోస్ట్ చేయండి